Gaur dute Zarauzko IATko langileek hirugarren greba eguna. Zarauzko zentroaren aurrean bildu dira goizean langileak, ELA sindikatuaren hitzetan, "lan baldintzetan aurrerapauso garrantzitsu bat ekarriko zuen enpresa hitzarmen bat sinatzeko helburuarekin". Izan ere, sektore berean lan bera egiten duten langileen artean "berdintasuna eta justizia" lortzea nahi dute.
Enpresak Gasteizko hiru ordezkarirekin "eraginkortasun mugatuko akordioa" sinatu badu ere, beharginek salatu dute akordio hori ez dela Itasua enpresako langile guztien ordezkaritzarekin adostu. Hain justu ere, Zarauzko langileek ez dute akordio horrekin bat egin, eta "negoziazio mahaira itzultzea eta benetako akordio justu bat lortzea" da beraien nahia. Halaber, enpresak akordio baterako borondate "eskasa" erakutsi duela salatu dute.
ELA sindikatuak hiru greba egun iragarri zituen Zarauzko IAT zentroan. Joan zen ekainaren 29a egin zuten lehen greba eguna, eta, asteazkenean, bigarrena; Bergaran (Gipuzkoa) egin zuten protesta, Zarauzko langileek hango IATko langileekin batera. Gaurkoa izan da hirugarren eguna, eta ELAk esan duenez, uztailaren 13tik aurrera greba mugagabeari ekingo diote "egoera desblokeatzen ez bada".