Zarauzko Udal Gobernuaren «etorkizuneko lan tresna» da 2015-2019 Agintaldirako Plana. Datozen urteetako erronkei erantzuteko sortu dute dokumentua, eta bertan jaso dituzte agintaldirako helburu estrategiko nagusiak lortzeko jarduera garrantzitsuenak. Xabier Txurruka alkatearen arabera, udal langile eta teknikarien laguntzarekin, agintaldi honetako ekintza politikoa «behar bezala» planifikatu dute horren bidez. «Plan honek udal antolaketa eta kudeaketa eraldatu nahi ditu», adierazi zuen alkateak aurkezpenean: «Zarauztarrei eskaintzen zaizkien zerbitzuen kalitatea etengabe hobetzea da helburua, proiektu zehatzei dagozkien ildo nagusiak zehaztuta».
Hala, hiru arlo nagusitan banatu dute lau urtetako gobernu ekintza: Herritarrak, Lurraldea eta Antolakuntza. Herritarrak atalean, zarauztarren ongizatea bermatzeko jarraibideak zehaztu dituzte. Gobernuko ekintza guztiak herritarrei zuzenduta daudela jakinarazi zuen Gloria Vazquez Udal Gobernuko kideak. «Horrela izan behar du derrigorrez, udal baten betebeharra herritarrei zerbitzua eskaintzea baita».
Lurraldea atalari dagokionez, etxebizitza, industrialde eta natur guneen inguruko ekintzak jaso dituzte. Antolakuntza-n, berriz, udal antolamenduaren ingurukoak.
131 ekintza
Guztira, 131 ekintza zehatz jaso dituzte 2015-2019 Agintaldirako Planean, hiru ildo nagusi horietan banatuta: 59 ekintza Herritarrak atalean, 36 Antolakuntza-n eta 36 Lurraldea-n. Batzuk martxan daude dagoeneko: Astiko instalazioak hobetzeko plan berezia onartu dute, eta HAZ Herritarren Arreta Zerbitzua sortzeko lanean hasi dira, esaterako. Beste hainbat «etorkizun hurbilean» landuko dituzte. Hain zuzen, dokumentuaren bukaeran kronografia bat ere gehitu dute, datak zehazteko. «Garrantzia eman nahi diogu aurrekontuak, egutegia eta epeak finkatzeari, lanerako tresna eraginkorra izan dadin», zehaztu zuen Txurrukak.
Ekintza horiek guztiak aurrera eramateko, 14.352.000 euroko inbertsioa egingo dutela aurreikusi dute. Dagoeneko beste administrazioekin harremanetan jarri da Udal Gobernua, zenbait partida lotze aldera. Txurrukak jakinarazi du ekintza horiek ez direla guztiak: «Egunerokotasunean askoz ere zerbitzu gehiago eskaintzen ditu udalak, baina ohikotasunetik ateratzen direnak nabarmendu ditugu».
«Gardentasun osoz aritu nahi dugu», esan zuen Vazquezek. Horregatik herritarren eskura jarri dute dokumentua. www.zarautz.eus webgunean deskargatu daiteke. Era berean, udaletxean eskura daiteke dokumentua