Gonzalo Urkia Txapelketarekin agurtu zuten atzo futbolaren bueltako festa Asti futbol zelaian: Reala izan zen onena bertan, finalean Lengokoak 3-1 taldea garaituta. ZKE Futbolak antolatuta, hiru txapelketa jokatu dituzte asteburuan Astin: XX. Jose Angel Iribar Txapelketa, Zarauzko Alebin Nesken VII. Txapelketa eta Gonzalo Urkia Txapelketa.
Lau multzotan banatuta ekin zioten txapelketari, 09:30 aldera. ZKEk hiru talderekin hasi zuen lehia, baina A taldeak soilik lortu zuen lehen fasetik aurrera egitea. Finalerdietan Realak Orioko hartu zuen mendean, finalera sailkatzen lehen taldea bilakatuz. Lengokoakek, berriz, ZKE A taldeari irabazi zion.
Realaren eta Lengokoak taldearen arteko finala ez ezik, hirugarren eta laugarren postuak erabakitzeko partida ere jokatu zuten: ZKE A izan zen txapelduna, Oriokori 3-0 irabazita. Jokalari onenaren saria Aurrera Ondarroa taldeko Aimar Badiolari eman zioten.
Ostiralean jokatutako XX. Jose Angel Iribar Futbol Txapelketan Athletic nagusitu zen; Zarauzko Alebin Nesken VII. Txapelketan, berriz, Reala.