Igaro den asteburuan Zarautzen salatu duten sexu erasoa irmoki salatu eta arbuiatu du Gipuzkoako Foru Aldundiak ere, adierazpen baten bitartez. Aldi berean, "elkartasun osoa eta babesa" eskaini dizkio foru erakundeak sexu erasoa pairatu duen emakumeari nahiz haren gertuko lagun eta senitartekoei.
Emakumeen kontrako indarkeriaren aurrean erantzun publikoa emateko Gipuzkoako protokolo instituzionalari jarraituz, aldundiak bat egiten du Zarauzko Udalak atzo kaleratu zuen adierazpenarekin.
"Beste behin ere, gizon eta emakumeen berdintasunaren aldarrian jartzen dugu azpimarra, halako erasoen oinarri-oinarrian gizon eta emakumeen berdintasun eza baitago, emakumeak kontrolpean izan nahi dituzten jarrera eta ideia matxistak. Emakumeen duintasuna, sexu askatasuna eta integritate fisikoa eskubide urraezinak dira. Eskubide horien aurkako ekintzak erabat onartezinak dira, eta ez dute lekurik gure gizartean. Egungo testuinguruan, aisialdirako eta gizarte harremanetarako aukerak berreskuratzen ari garen testuinguru honetan, are irmoago adierazten eta zabaltzen dugu indarkeria matxistaren aurkako mezua. Emakume guztiek dute aisialdiaz eta gizarte harremanez askatasun osoz gozatzeko eskubidea, eta, horregatik, indarkeria sexistarik gabeko kale, auzo, udalerri eta hiriak nahi ditugu", azaldu du adierapenean aldundiak.
Azkenik, erakundeak herritar guztiei dei egin die bortizkeria matxistaren aurrean erne jarraitzeko eta halako erasoen aurkako jarrera erakusteko. Jakinarazi du parte hartuko duela udalak gaur eguerdirako (12:00etan) finkatu duen salaketa elkarretaratzean Miren Elgarresta Berdintasunerako foru zuzendariak.
