Ligako azken estropada jokatu dute gaur Bilbon KAE 1 ligako arraunlariek. Enbata seigarren postuan sailkatu da gaurkoan (20:46,20), eta San Juanek irabazi du estropada (20:23,42). San Juanen atzetik iritsi dira getariarrak (20:30,68), eta hirugarren izan da Donostiarra (20:33,12).
Gaur zazpi puntu eskuratu dituzte zarauztarrek, baina aurreko astetik erabakita zegoen moduan,eutsi egin diote ligako lidertzari; KAE 1 ligako txapelduna da Enbata, beraz. Kontxako estropadako sailkapena izango dute hurrengo erronka, eta horren atzetik, irailaren 14 eta 15ean, play off-ak jokatuko dituzte Bermeon eta Portugaleten, TKE ligara igotzeko txartela jokoan dutela.
Denboraldiko lorpenak ospatzeko, ongietorria egingo diete gaur 20:00etan Musika Plazan herritarrek Enbatako arraunlariei. Arraun Elkarteak urdinez jantzita bertaratzera animatu ditu zarauztarrak. Ongietorriaren aurretik banderen bedeinkapena izango da parrokian.