Ane Labakak lortu du garaipena Euskal Herriko Bertsolari Txapelketaren lehen faseko hirugarren saioan. Lekeitioko (Bizkaia) Santi Brouard pilotalekuan jokatu dute saioa, eta Lasarte-Oriako bertsolariak pilatu du puntu gehien: 681 puntu. Hori hala, Gernika-Lumoko (Bizkaia) finalaurrekoan kantatuko du, azaroaren 7an. Aner Peritz bigarren sailkatu da, Labakarengandik bi puntu eskasera, 679 punturekin.
Peritzek, ordea, lehen fasea osatzeko falta diren gainerako saioei erreparatu beharko die finalaurrekoetara sailkatu ahal izateko. Gaur-gaurkoz, lehen fasea amaitzeko beste lau saio falta dira: Donapaleukoa (Nafarroa Beherea), Tolosakoa (Gipuzkoa), Gotaine-Iribarnekoa (Zuberoa) eta Aguraingoa (Araba). Nolanahi ere, Peritzek, Maddalen Arzalluzek eta Aitor Bizkarrak atzo Altsasuko (Nafarroa) saioa irabazi zuen Oier Etxeberria azpeitiarrak baino puntu gehiago jaso dituzte gaur (672,5 puntu): 679 puntu Peritzek, 677,5 puntu Arzalluzek eta 676 puntu Bizkarrak.
Lehen laukote horretatik koska bat beherago sailkatu da gaur Lekeition Eneritz Artetxe; azkoitiarrak 646 puntu jaso ditu. Seigarrena izan den Aroa Arrizubietak, ostera, 616 puntu batu ditu. Goraino bete da Santi Brouard pilotalekua; izan ere, sarrera guztiak salduta, ia 1.000 bertsozale bildu dira han. Idoia Anzorandia aritu da gaur bertsotan aritu diren sei lagunei gaiak jartzen.