Atzo iluntzean jokatu zuten Bertsolari gazteen aurtengo Lizardi Sariko finala, Modelo aretoan, eta Haizea Arana eskoriatzarra nagusitu zen 272,5 punturekin. Arana oso fin aritu zen atzoko finalean eta ongi merezitako txapela lortu zuen. Aitor Alberdik, 2017tik antolakuntzan egondakoak, txapeldunari txapela jartzeko aukera izan zuen.
Haira Aizpuruk gertutik jarraitu zion Aranari, eta 271 punturekin bigarren postua eskuratu zuen. Hirugarren postua, berriz, Maddi Aiestaranentzat izan zen 262 punturekin. Haren atzetik, ondorengoak sailkatu ziren: Bittor Altube abadiñarra, 253,5 punturekin; Irantzu Idoate hazpandarra, 249,5 punturekin; eta azkenik, Martin Abarrategi aramaioarra, 246 punturekin.
Halaber, 42. Basarri bertsopaper lehiaketako bertso sorta sariduna entzuteko aukera izan zuten atzo bertaratu zirenek. Uxue Alberdi bertsolari eta idazle elgoibartarrak lehen aldiz abestu zuen bertso sorta, Kantu egin behar det doinuan.
1) Gogoan dauzkat marka
kolorea, forma...
Opel Kadett marfila,
bertan lau pertsona.
Memorian lotuta
dauzkat handik hona
aitaren kolonia,
gasolina, goma,
herri irteerako
surtidore ona
ta Sugusak ematen
zizkidan gizona.
2) Lehenago izan ziren
Citroen horia
ta Dyane 6 laranja
-aitaren loria-.
Erroma, Soria...
bikote maitemindu
baten euforia.
Hala ikasi nuen
zer zen memoria
ta ni baino lehen hasi
zela historia.
3) Pinu berde ilun bat
aurrean zintzilik,
ama etzanda lotan
ta aita isilik.
Gu_atzean belauniko
ta gero bil-bilik
inguruetn bazen
guardia zibilik...
Jolasa zen ez zirkin
ez arnas debilik
ea lortzen genuen
irautea hilik.
4) Sutan Errenteria,
Elgoibar, Hernani,
kaleak barrikada,
pintada ta mani.
"20 urte erori
zitzaizkion Roldani",
"etsitzea tokatu
zaio Leitzarani",
"Tourrean Lejarreta
eta Cabestani...",
ta atzeko partean
bakean lotan ni.
5) Baina denborak badu
bere kadentzia,
ta Kadettak herdoila
ta dekadentzia.
Hilekoa zen marka
ta ebidentzia,
hil zela auto hura
ta inozentzia.
Horrela lotu ziren
Vectra bat, zientzia,
urdin elektrikoa
ta adoleszentzia.
6) Ta aitaren autotik
gizonen katean,
nengoen mutil baten
auto granatean.
Esku nerbioso bat
kamisetapean,
lurruna leihoetan,
bera bolantean...
haragiak ulertu
zuen bat-batean
zerbai utzi zuela
atzeko partean.
7) Batu ziren gasoila
ta bertsolaritza,
nire lehen soldaata
ta udako brisa,
lehenengo bolantea,
frenoa, txasisa...
Nahi banuen gelditu
eta egin txixa,
bertan lo egin edo
gidatu Parisa...
nire zain egoten zen
Toyota Yarisa.
8) Gero elkartu ziren
heriotz-ezkilak,
helduaro bat eta
bi umeren sillak.
Kotxe heredatuan
kantu infantilak,
"lotu gerrikoak!" ta
"itxi bentanillak!"...
Nola sartzen dituen
egunen gurpilak
auto bakar batean
biziak ta hilak.
9) Asteazken goiz batez
Ford C-Max kakian,
oraindik erdi lotan
goizeko flakian.
Gerrari bolumena
jaitsi irratian,
bonba hotsak airean
ta ni terapian...
Salbu sentitzen gara
gure lubakian
bakoitza norberaren
txatarra zatian.
10) Leihoan euri tantak,
bi zeru more han...
Orain bakarrik noa
auto dotorean.
Denbora kopilotu
dut isil-gordean,
nahiz noan abiada
kontserbadorean,
begia zerumuga
erredentorean...
Zerbait desagertu da
retrobisorean.
(Argazkiak: utzitakoak).