Atzo goizean elkartu ziren Donostiako Lan Harremanen Kontseiluan (CRL) Zarauzko eta Bergarako IATko langileak enpresarekin. Bilerak ez zuen emaitzarik eman, eta greba mugagabeari eutsiko diotela jakinarazi zuten beharginek. Horren aurrean, Eusko Jaurlaritzari gatazkan inplikatzeko eskatu zion ELA sindikatuak.
Horrez gain, enpresa greba eskubidea "urratzen" ari dela salatu zuen sindikatuak, "greban dauden langileen lanpostuak kontratazio berriekin ordezkatzen" ari baita. Hori horrela, ELAk Lan Ikuskaritzaren aurrean salatu zuen greba eskubidearen urraketa hori, eta Ikuskaritzak arrazoia eman dio. Sindikatuaren esanetan, "egindako ebazpenak argi jasotzen du kontratatutako langile horrek grebalariak ordezkatzeko helburua izan duela". Gainera, Lan Ikuskaritzak "arau hauste larritzat" jo du enpresaren jokabidea, eta horri dagokion zigorra jartzeko prozesuari ekin dio.
ELAk jakinarazi duenez, langileek "pozik" hartu dute berria, eta zuzendaritzari berriz eskatu diote horrelako ekintzetan baino, "hitzarmenaren negoziaketan" zentratzeko. Negoziazioan aurrerapausorik eman ezean, abuztuan "grebari eusteko indarra" dutela adierazi dute langileek.