ZKE Halterofiliak antolatuta, Zarautz Altxa saria jokatuko dute larunbat arratsaldean malekoian, Dama parean. Urtero bezala, etxeko taldearekin batera, beste bi klub gonbidatzen dituzte txapelketan parte hartzera, eta, aurten, Mont-de-Marsan hiriko (Frantzia) Stade Montois eta Iruñeko Anaitasuna ariko dira nor baino nor.
Kirol ekitaldia arratsalde osoan zehar jokatuko da, eta antolatzaileek jakitera eman dutenez, lau txandatan banatuko dituzte lehiak: 14:30ean, gizonezkoak hasiko dira; 15:30ean, emakumezkoek ekingo diote; 16:30ean, berriro gizonezkoak ariko dira; eta 17:30ean, azkenik, emakumezkoek emango diote amaiera txapelketari.
Era berean, ZKE Halterofiliako gaztetxoek teknika erakustaldia egingo dute. Lehiatik kanpo, ikasturtean zehar ikasitakoa jendaurrera eramango dute pultsolari hasiberriek.