Gaur goizean abiatu da Emakumeen Euskal Herriko Itzuliaren lehen etapa Zarauztik, eta Getaria, Zumaia, Azpeitia, Azkoitia eta Aizarnazabal igaro ostean, Zarautzen bertan amaitu da. Txirrindulariek haizeari eta euriari aurre egin behar izan diote 121 kilometroko ibilbidean zehar, eta hiru orduko lehiaren ostean, Mischa Bredewold helmugaratu da aurrena. Hirugarren urtez jarraian irabazi du Euskal Herriko Itzuliko lehen etapa txirrindulari herbeheretarrak eta liderraren maillot horia jantzi du. Usoa Ostolaza zarauztarra zazpigarren tokian sailkatu da gaurkoan, onenekin lehian aritu ostean. Herritarren babesa nabaritu du Ostolazak, eta hunkituta agertu da etaparen amaieran, baita pozik ere, taldeak egindako lanagatik.
Beste urteetan bezala, ikusmina sortu du Emakumeen Euskal Herriko Itzuliak eskualdeko herrietan, eta Zarautzen, esaterako, haurrak zein helduak atera dira kalera txirrindulariak animatzera.