24. Korrika Zarautzera iristeko atzera kontaketa hasi da jada. 16:00 aldera sartuko da bihar euskararen aldeko egitasmoa herrira, eta kaleak zeharkatuko ditu, ondoren Getariarantz abiatzeko. Eguna ez da hor bukatuko ordea, Korrika batzordeak arratsalderako egitaraua prestatu baitu.
Hala, Korrikak Zarautz igarotzen duenean, Iñurritza jubilatuen elkartean txokolatea banatuko dute. 17:30ean, TTB DJ-ak Musika Plazara gerturatzen diren guztiak dantzan jarriko ditu, eta 19:00etatik aurrera pintxo-petoa hasiko da. Bertan, Arrai Zopa kantu taldea eta Arranoko gitarristen txanda izango da, eta antolatzaileek aurreratu dutenez, opariak ere egongo dira. Hala, bihar Korrikako petoa janztera animatu dituzte herritarrak.