Malen Monasterio halterofilo zarauztarra Forden (Norvegia) jokatzen ari diren Munduko Txapelketan parte hartzen ari da, eta emaitza ezin hobea lortu zuen atzo 53 kiloko kategorian. Guztira, 185 kilo altxatu zituen: kolpe bakarreko modalitatean 83 kilo, eta bi denboratan, berriz, 102 kilo.
Emaitza horiei esker, Espainiako marka berria ezartzea lortu zuen maila absolutuan zein jubeniletan bi denborako modalitatean eta marka olinpikoan. Monasterio "oso pozik" agertu da txapelketan egindako lanarekin eta egindako balentriarekin.
C txandan aritu da lehian, eta lehen postuan dago kokatuta hiru modalitateetan; hau da, kolpe bakarreko modalitatean, bi denboratan eta bere txandako sailkapen orokorrean. Orain A eta B multzokoek egiten dutenaren zain geratu beharko du; nolabait ere, txanda horietako emaitzek baldintzatuko dute sailkapen orokorra eta zarauztarrak dominaren bat eskuratzeko aukera.