Zarauzko Gurutze Gorriaren Herri Biltzarrak hainbat ikastaro antolatu ditu martxoaren 1etik aurrera: Lehen sorospenen ikastaroa; Desfibriladore erdi-automatikoa erabiltzeko ikastaroa eta Uretako sorospen ikastaroa.
Lehen Sorospenen ikastaroan parte hartzen dutenek ezusteko gaixotasun edo istripu baten aurrean eman beharreko oinarrizko pausoak ikasiko dituzte: besteak beste, bihotz-biriken berpizkundea eta zaurien zaintza. Ikastaroan izena emateko baldintza bakarra gutxienez 16 urte izatea da, eta era berean, ikastaroa baliagarria da unibertsitatean aukera askeko kredituak lortzeko.
Desfibriladore Erdi-automatikoa erabiltzeko ikastaroan bihotz-geldialdi bat artatzeko erabilgarriak diren gailuak nola erabili erakutsiko dute, formatu laburrean.
Uretako sorospenen ikastaroan, berriz, uretan eta itsasoan sorospena emateko teknikak landuko dituzte parte hartzaileek, hondartza eta itsas-inguruaren ezagutzaz gain. Ikastaro hau egin ahal izateko 18 urte beteak izan behar dira.
Ikastaroen inguruko informazioa lortzeko edo izena emateko, 610-10-28-72 telefonora deitu edo zarautz@cruzroja.es helbide elektronikora idatzi dezakete interesatuek.