Gustura aritu ziren atzo Zarauzko Bikote Mistoen Kroseko 44. edizioko parte hartzaileak. Ia 1.200 izan ziren 7,8 kilometroko ibilbidea amaitu zutenak eta animorik ere ez zitzaien falta izan, eguraldia lagun jende asko bertaratu baitzen kirol erakustaldia bertatik bertara jarraitzeko. Jon Unzueta eta Judith Otazua izan ziren azkarrenak bigarren urtez jarraian, eta, aitortu dute aurtengo ibilbidea "iazkoa baino gehiago" gustatu zaiela. Halaber, kaleko "giro ona" nabarmendu dute bi korrikalariek.
Etxekoen artean, berriz, Ainhoa Muruak eta Igor Etxeberriak lortu zuten denbora onena. Nolanahi ere, sailkapenaz eta markez harago, parte hartzaile guztiek gozatu zuten atzokoan bikoetan korrika egiten. Amaieran, gainera, korrika gastatutako indarrak berreskuratzeko aukera izan zuten Zarautz Rugby Taldekoek eskaini zituzten parrillan egindako pintxoekin.
