Zarauzko Udalak atzo jakinarazi zuen Ene Kantak taldeak igande honetan eskaintzekoa zuen Emozio festa! haurrentzako antzerkia bertan behera utzi behar izan dutela osasun arrazoiak tarteko. Bada, dagoeneko iragarri dute emanaldirako data berria: martxoaren 5ean egingo dute ordu eta leku berean, 16:45ean, Modelon, alegia.
Data berria zehaztearekin batera, udalak jakinarazi du igande honetako saiorako sarrera erosi zuten herritarrek sarrera berarekin joan ahalko dutela hitzordu berrira. Aldiz, dirua itzultzea nahiago dutenek kultura sailarekin harremanetan jarri beharko du kultura@zarautz.eus helbidera idatzita edo 943-00 51 20 telefono zenbakira deituta.
Halaber, haurrak igande honetan eurentzako eskaintzarik gabe geratu ez daitezen Yoko oporretan animaziozko filma emango dutela ere jakinarazi du udalak. Euskaraz botako dute 16:45ean hasita.
Aipatutakoaz gain, beste aldaketa baten berri ere eman du kultura sailak, apirilaren 30erako iragarri zuten Chatungla emanaldia apirilaren 23ra aurreratu baitute.
