Hirugarren urtez, Stance ISA World Adaptive Surfing Championship proban hartuko du parte Aitor Frantzesena Gallo-k. Iazko garaipenaren ondoren, ikusmen arazoak dituztenen mailan lehiatuko da aurten ere La Jollan (San Diego, Kalifornia, AEB). Txapelketa hilaren 29etik abenduaren 3ra bitartean jokatuko dute.
Proba hasi baino lehen, hilaren 28an, egingo diete parte hartzaileei ongietorria, eta bezperan, hilaren 29an, berriz, surf egokituko clinic saioa eta irekiera ekitaldia izango dira. Lehia, berriz, azaroaren 30etik aurrera izango da eta parte-hartzaileak norbanako gisa zein taldeka hartuko dute parte.
Gallorentzat hirugarren urtea da txapelketan parte hartzen duena. Lehenbiziko proban, 2015ean, final laurdenetara heldu zen zarauztarra, eta bigarrengoan, iazkoan, txapeldun izan zen bere mailan. Aurreko urteetan bezala, zuzenean jarraitu ahalko da aurtengo txapelketa, ISA nazioarteko surf elkartearen atarian.