Txirrindularitza egokituaren asteburua izango da datorren hau. Gipuzkoako eta euskadiko Txapelketak jokatuko dituzte Andoainen eta Zarautzen. Bihar, erlojupeko modalitatean lehiatuko dira Andoainen, eta etzi errepidean, Zarautzen. Zarauztarra Kirol Elkarteak antolatutako IX. Zarauzko Hiria Kriteriuma baliatuko dute horretarako.
Hainbat kategoria eta distantzia izango dira, guztiak ere Zarautz eta Getaria arteko N-634 errepidean jokatuko direnak: handbike-ak, 40 kilometro; trizikloak, 20 kilometro; tandemak, 60 kilometro; eta bizikletak, 60 kilometro. Izenak egunean bertan eman ahal izango dira, 08:30etatik aurrera, Lege Zaharren enparantzan, eta ordubete geroago, 09:30ean, hasiera emango diote lasterketari.
Helmuga Nafarroa kalean atonduko dute, Belauntzaran plaza (Duke Enea) parean. Sari banaketa ekitaldia, ordea, Lege Zaharren enparantzan egingo dute, 12:00etan, eta ondoren, solasaldia izango da kirolariekin.
