Zer ari da gertatzen munduan? Gerraz eta inperialismoaz izenburupean hitzaldi bana emango da etzi, ostiralean, Zarautzen eta Zumaian, Urola Kostako Kontseilu Sozialistak eta Gazte Koordinadora Sozialistak antolatuta. Bi saioak 18:30ean hasiko dira, eta Zarauzkoa Frontoi Txikin izango da, eta Oxford aretoan Zumaiakoa.
Bi ekitaldiak Maiatzak 1, Langileen Nazioarteko Egunaren harira antolatu dituzte. Aipatu egunean, manifestazio nazionala deitu du Euskal Herriko Kontseilu Sozialistak Iruñean (Nafarroa), Gerra inperialistaren aurka, NATO desegin eta sionismoa suntsitu lelopean.