Desioak Sutan ekitaldia egingo dute Zarautzen abuztuaren 16an

Getarian ere egin dute aurten Desioak Sutan ekitaldia (Amaia Ventas Aldabaldetreku/Hitza)

«Desio bat dut, airean doa, sutan bilduta, zuretzat. Piztuta utzi, hegan egiten, basamortua argi dezan».Zarautzen 4.000 suzko desio botako dituzte zerura abuztuaren 16an, gauean. Baina arratsaldean hasiko da Desioak Sutan Sahararentzat elkartasun festa. 16:00etatik aurrera, musika eta tea eskainiko dituzte Sortaldea kanpoaldean jarriko duten haiman. Ondoren, pailazoak izango dira, eta 20:00etatik 21:30era Aziza Brahim sahararrak kontzertua eskainiko du leku berean.

Desio bat dut abestia

22:00etatik aurrera hasiko dira zarauztarrak su bolak eta desioak zeruratzen. Ordu horretan jarriko dute Eñaut Elorrietak eta Brahimek ekitaldirako propio egin duten abestia ere: Desio bat dut.

Elorrietak adierazi du abesti hori egiteak Saharako errealitatera gerturatzeko balio izan diola, eta Brahimekin esperientzia hori partekatzeak sahararren kultura eta hizkuntzarekin lotura berriak egitea, besteak beste.

Gari Berasaluze zarauztarrak egin du abestiaren letra, eta Juanfe Garcesek grabatu du bideoklipa, Oporrak Bakean programaren barruan Euskal Herrira uda pasatzera etorri diren haur sahararrekin eta bi abeslariekin. Sarean dago ikusgai.

Jesus Arana Zarauzko alkateordeak esan du su bola bakoitza aireratzean gogoratzeko herri baten sufrimendua dagoela atzean.

Aurten, Zarautzen ez ezik 10 herri gehiagotan egingo dute Desioak Sutan Sahararentzat saioa.

https://youtu.be/ndgW4rEZd4I