Galiziako Teatro O Cubo taldeak Voo ikuskizuna taularatuko du igande honetan Modelo aretoan, familia osoari zuzenduta. Antzerki fisikoan eta objektuen manipulazioan oinarritutako obra eskainiko dute Uxía Algarrak eta Sofía Espiñeirak, eta utopia eder bat izango dute ardatz: hegorik gabe hegan egin ahal izatea.
Hori horrela, grabitate gabezian eta fantasian murgilduko dituzte ikusleak. Ilusioarekin eta harridurarekin jokatuz, amets egitera gonbituko dituzte Modelora bertaratzen diren guztiak. Horretarako, dantza, musika, mugimendua, poesia bisuala eta komikotasuna presente izango dituzte, eta argi utzi dute ikuskizuna zentzumenetarako bidaia bat dela.
Emanaldia 16:45ean hasiko da, eta sarrerak Modeloko txarteldegian edo Kutxabankeko atari digitalean eskuratu daitezke, 4,45 euroan.