Pasa den urtean antolatu zuten estreinakoz Kostamendi zikloturistentzako martxa, eta, antolatzaileen pozerako, dortsal guztiak agortu zituzten. Lehen aldiko arrakasta ikusita, bigarren urtez antolatu du martxa Zarauztarra Txirrindulari Kirol Elkarteak: irailaren 20an izango da, igandez.
100 kilometroko ibilbidea izango da, 1.250 metroko desnibel positiboarekin, eta hasiera zein amaiera Zarautzen izango dira. Ibilbidean zehar, Zumaiatik Itziar, Mutrikutik Kalbario eta Elgoibartik Azkarate igoko dituzte, besteak beste.
Iaz, Usoa Ostolaza etxeko txirrindularia omendu zuten ekitaldiaren aurretik, eta aurten ere izango da gonbidatu berezirik: Ane Santesteban Errenteriako (Gipuzkoa) txirrindulari profesional ohiak parte hartuko du hitzorduan.
Hori horrela izanik, martxan parte hartu nahi dutenek irailaren 13ra arte izango dute dortsala eskuratzeko aukera. Horretarako, rockthesport.com webgunera jo beharko dute.