Tahitiko (Frantziar Polinesia) Teahupoʻo hondartzan lehiatzen ari diren Outerknown Tahiti Pro txapelketan debuta egin du Nadia Erostarbe surflari zarauztarrak. Championship Tour zirkuiturako puntuagarria den proba da Ozeaniako uretan egiten ari direna, eta ezin hobeto ekin dio Erostarbek lehiari.
Itsasoaren egoerak eta haize ufada handiek zaildu egin dute surflarien lana. Francisca Veselko portugaldarra izan du aurkari Erostarbek lehian. Biek ere lehen urtea dute zirkuituan, eta portugaldarrak maniobrak egiteari ekin badio, Erostarbek hodien aldeko apostua egin du. Ondo atera zaio estrategia zarauztarrari, 8,67 punturekin irabazi eta txapelketaren hurrengo txandara pasatu delako. Berea izan da, gainera, txandako olaturik onena; 6.17 puntuko olatua hartu du Erostarbek.
Bigarren txandan Lakey Peterson estatubatuarra izango du aurkari zarauztarrak. Zuzenean bigarren txandan hasiko du lehia surflari estatubatuarrak.