Eusko Jaurlaritzako Osasun Sailak bertan behera utzi du Zarauzko eta Zumaiako Santiago hondartzetan bainatzeko debekua. Bi hondartza horietako urari egindako azken analisien arabera, kalitate aldetik irizpide mikrobiologiko guztiak betetzen dituzte bi hareatzek, eta, beraz, baimendu egin du haietan bainatzea.
Osasun Sailak euskal kostaldeko hondartza batzuetan bainatzea debekatu zuen pasa den asteartean. Horien artean ziren Zarauzkoa eta Zumaiako Santiago hondartzan; eskualdeko beste hondartzetan, aldiz, ez zuen debeku hori ezarri. Egindako analisiek ondorioztatu zuten debekua jasotako hondartzetako urak ez zuela betetzen ezarritako kalitate irizpide mikrobiologikoa. Atzo ere ez bainatzeko gomendioak indarrean jarraitu zuen, baina gaur goizean debekua bertan behera uztea erabaki du Jaurlaritzako departamentuak.