Hainbat herritar bildu ziren atzo Musika Plazako kioskoan, Usurbilgo eta Orioko zaintza proiektu sarituak ezagutzeko asmoz, Zarauzko EH Bilduk antolatuko ekitaldian. Plaza pixkanaka-pixkanaka betetzen joan zen, eta erabilgarri zeuden aulki guztiak bete ziren.
Ander Lukas Zarauzko EH Bilduko zinegotzia, Anuska Esnal Orioko alkatea eta Agurtzane Solabarrieta Usurbilgo alkatea herritarren aurrean eseri ziren Usurbilgo eta Orioko zaintza proiektuak aurkeztu asmoz. Bi herriak "puntakoak" diren proiektu sozialak ari dira garatzen "zaintzaren ikuspegi integrala landuta, eta langile, herritar eta udal ordezkarien arteko elkarlana sustatuz". Hori da, hain zuzen ere, koalizioak Zarautzen aldarrikatu nahi duena, izan ere, herria "biziberritzeko beharra" dagoela iritzi diote.