Xabier Etxeberriak ondutako Super Mario hil behar dut komikiak jaso du Joseba Jaka sormen beka, Elkar fundazioaren eskutik, atzo arratsaldean egindako ekitaldian. Andoainen (Gipuzkoa) ospatu zuten saioa, Martin Ugalde kultur parkean, eta bertan Ibilbidearen Elkar saria ere banatu zuten: Hizkuntz Eskubideen Behatokiarentzat izan zen hori, hain zuzen.
Etxeberriak Maria Reyesekin eta Javier Andradekin batera ondu du Super Mario hil behar dut proiektua. Epaimahaiaren hitzetan, proposamena "ausarta" da. Besteak beste, genero berdintasuna eta homofobia gaiak jorratzen ditu. "Gai serioak, baita tragikoak ere, umorez zipriztinduta, eramangarriagoak eman dezakete: garrantzia kendu gabe, gure gizartearen ispilu bihurtzen dira, istorio honetan bezala", gehitu du.
Etxeberriak hartu zuen hitza atzoko sari banaketa ekitaldian, eta proiektuaren hastapenak gogora ekarriz, ondorengoa esan zuen: "Nik neuk beti sinetsi izan dut istorio honen indarrean, nahiz eta erditzea luzea izaten ari den". Aitortu zuenez, gazteentzako eleberri bezala idatzi zuen hasieran, eta eleberri grafikora aldatzea proposatu zioten agentzian ondoren: "Bakarkako lana izateari utzi eta talde lana bihurtu zen orduan, komiki gehienak diren bezala".