Eusko Jaurlaritzaren eta Zarauzko Udalaren ekimenez, Espainiako Kopako finala ikusteko pantaila erraldoia jarriko dute herrian, Lege Zaharren Enparantzan. Apirilaren 18an, 21:00etan, dute Realak eta Atletico Madrilek hitzordu handia, Sevillako (Espainia) La Cartuja zelaian. Gipuzkoako beste hainbat herrietan bezala, Zarautzen ere partida zuzenean ikusteko pantaila handia jarriko dute.
Aurreratu dutenez, gainera, partidaren aurretik ere izango dira festa giroan sartzen joateko jarduerak: haurrentzako puzgarriak, DJ saioa eta argazkien txokoa ere jarriko dituzte, esaterako. Jolas horien irekiera 17:30 aldera izango da, eta partida ordura arte egongo dira zabalik; 21:00 aldera arte, alegia.
Goizane Alvarez Kultura eta Kirol diputatuak azpimarratu duenez, ekimen honen helburua da "amaiera historiko baten emozioa lurraldeko hainbat udalerritara eramatea, eta jardunaldi hau modu partekatuan, irekian eta hurbilean bizitzea". Ildo horretatik, gaineratu du Sevillara joan ezin duten herritarrei finala "sentitzeko, ospatzeko eta bizitzeko" aukera eman nahi diela.