Bigarren urtez jarraian, dozenaka eta dozenaka eskalatzaile ari dira II. Klimb Masters Euskadi Basque Country txapelketan parte hartzen, 105, zehatzago esanda. Goizean goiztik hasita, kirolariek zailtasun ezberdineko 30 ibilbide izan dituzte aurrean lehen fasean, eta bakoitzak amaitutako hamar ibilbide zailenek baldintzatuko dute nor igaroko diren biharko finalerdietarako. Alegia, ibilbide zailenak –eta beraz, puntuazio gehiago ematen dutenak– egin dituztenak igaroko dira biharko fasera.
Finalerdiak 10:00etatik aurrera jokatuko dituzte bihar, eta bertako hamabi hoberenek, sei neskak eta sei mutilek, finala jokatuko dute 18:00etan. Azken hitzordu hori zuzenean emango du EITBk, eta bertatik bertara ikusteko 65 sarrera salduko dituzte, 15 euroan.