Espezializazio goiztiarra ez, multikirola bai lelopean, argazki jendetsua atera dute gaur eguerdian hondartzan. Dozenaka lagun elkartu dira, bai ikastetxe guztietako gaztetxoak eta bai euren gurasoak, denek ere "babes irmoa" adierazteko "herrian historikoki egin den kirol-aniztasunaren ereduari".
Azken arau aldaketak direla eta, Zarauztik "kalitatezko eredu anitz eta integral baten aldeko mezua indartu" nahi duela azpimarratu udalak, urteetan zehar eskaintza hori "eraginkorra, ekitatiboa eta onuragarria" izan delako. Gaitasun teknikoak, fisikoak, erabaki-hartzea eta ulermen taktikoa ez ezik, eskola kirolean "adiskidetasuna, errespetua eta ahalegina bezalako balioak barneratzen dituzte haurrek", udalaren esanetan.