Joan den larunbatean egin zuen Eusko Jaurlaritzak larrialdietako eta babes zibileko merezimenduen 2025eko dominak banatzeko ekitaldia, Polizia eta Larrialdietako Euskal Akademian. Ekitaldi horretan, babes zibilaren arloan egindako lanagatik nabarmendutako 41 pertsona aintzatetsi zituzten; tartean, Zingira Babes Zibila taldeko hainbat kide.
Zehazki, Agustin Gabirondok, Itziar Olazarrek, Esther Jauregik, Diego Gironek, Javier Etxabek eta Mikel Sorreluzek jaso zuten merezimendu domina taldearen 30. urteurrenean, aipatutako sei boluntario horiek 25 urte bete dituztelako taldean. Ekitaldian, herritarren bizia eta segurtasuna babesteko egunero esku hartzen dutenen konpromisoa eta profesionaltasuna eskertu nahi izan zitzaien boluntario sareko kideei.