Queen taldearen rock abestiak ozen entzun dira gaur arratsaldean Zarauzko Alde Zaharrean barrena. Adin guztietako 300 dantzari inguruk osatu dute Inauterietako IX. Konpartsa, eta kalerik kale ibili dira talde britainiarraren abestiak koreografia dotorez janzten.
17:30ean zuten aurreikusita desfilea, baina eguraldi txarraren ondorioz ordubetez atzeratu behar izan dute irteera. Denbora tarte hori, ordea, ez dute alferrik galdu dantzariek: musika jarri, eta entseatzen ibili dira Merkatu Plazan, kalera ateratzeko unea heldu zaien arte.
Ibilbidea Musika Plazan hasi dute, eta Alde Zahar guztia zeharkatu dute dantzan. Kale bazterrak, berriz, ikuslez bete dira, eta horietako batzuk konpartsako kideekin batera dantza egitera ere animatu dira. Ikuskizunak iraun duen bitartean zaparrada bat edo beste bota du, baina, oro har, ateri eutsi dio zeruak.
Gaur, larunbata
- 21:00-00:00. Disko festa DJ Bon-ekin, Zinema pilotalekuan.
- 23:00. Dantzaldia FAN&GO taldearekin, Musika Plazan.
Bihar, igandea
- 12:00. Kalejira, herriko kaleetan erraldoi, buruhandi eta Ustekabe txarangarekin.
- 17:00. KIKO, KOKO eta MOKO pailazoen ikuskizuna haurrentzat, Musika plazan (euria bada, Zinema pilotalekuan).
- 18:00. Disko festa nerabeentzat, Xaiborekin, Lege Zaharren enparantzan.