Saharautz Elkartasun Taldeak asteburuan egin du Sahararako Elkartasun Karabanarako janari-bilketa, eta guztira, 5.100 kilo janari eta konpresa bildu dituzte. Aurrez Zarauzko eta Getariako ikastetxeetan ere egin zuten bilketa.
Horren aurrean, Saharautzeko kideak "oso pozik" agertu dira herritarrek emandako erantzunarekin, eta "bereziki" azpimarratu nahi dute ikastetxeetako zuzendari, irakasle, guraso eta ikasleen inplikazioa. Horretaz gain, herriko saltokiek emandako erraztasunak eskertu nahi ditu Saharautzek, baita Zarauzko Udala ere, horiek emandako 9.000 euroko diru-laguntzagatik. Gainera, janari bilketan lagundu duten boluntarioen kopuruak gora egin dutela jakinarazi dute elkarteko kideek, eta hori "oso pozgarria" dela beraientzat. Haien esanetan, jasotako guztia datozen asteetan bideratuko dute Tindufeko kanpalekuetara.