Sanz Enea liburutegiak 2026rako ordutegia berritu du; horri esker, ordu gehiagoz egongo da zabalik orain. Hala, hemendik aurrera ordutegi jarraia izango du helduen liburutegiak astelehenetik ostiralera. Izan ere, eguerdietan ez dute itxiko. Larunbatetan, berriz, 09:00etatik 14:00etara egongo da zabalik helduen zein haurren liburutegia.
Liburutegiko zinegotzi arduradun Irune Urbietaren esanetan, urtetik urtera lanean jarraitzen dute "zarauztarrei liburutegiaren zerbitzua hobetzeko". Ordutegiaren zabalkuntzari dagokionez, zinegotziak esan du "herritarren erabilera ohitura eta gomendioak jarraituz" hartu dutela erabakia.
Haurrei zuzendutako tailerra
Horrez aparte, datorren hilabeterako haurrei zuzendutako tailerra antolatu dute: martxoaren 4an izango da, Elkartuz tailerra izenburupean. LH3 eta 4ko haurrei zuzenduta egongo da, eta asmoa da artea, sormena, feminismoa eta emozioen lanketa batzen dituzten irakurketa nahiz idazketa lantzea.
Hitzordu honetarako izen ematea otsailaren 25era bitartean zabalik egongo da, liburutegian bertan.