Santa Ageda bezpera izango da asteazkenean, eta usadioari jarraituz, Zarauzko Abesbatzako hiru taldeak, makilekin lurra kolpatuz, kantuan irtengo dira kalera. Goiztiarrenak, Txinpirin abesbatzako 7-9 urteko haurrak izango dira; 18:00etatik 19:00etara, kalez kale ariko dira Imanol Urbieta Musika Eskolako txistularien laguntzarekin.
Zarautz Abesbatzak eta Zarazte abesbatzak elkarrekin jardungo dute, Zarautztrik elkarteko trikitilariak eta Felix Zubia eta Aitor Urbieta bertsolariak lagun dituztela. Musika Plazan emango diote hasiera saioari , 19:30ean, eta koplen ohitura zaharrari eutsiz, 20:45 aldera arte ibiliko dira Alde Zaharra girotzen.