Urriaren 31n ospatuko den Gau Beltza dela eta, Santa Klara komentua beldurrez eta sustoz beteriko eszenatoki bihurtuko dute. Aurreko urteetako arrakasta ikusita, Gurutxurtuko kideek LH5. mailatik DBH4. mailara bitartekoentzat aurrez izen emateko sistema ezarriko dute. Hori dela eta, sarrerak larunbat honetan, urriaren 25ean, 18:00etan banatuko dira Musika Plazan. Taldeak hamar lagunekoak izango dira, adinaren arabera antolatuta, eta pertsona bakoitzak gehienez lau sarrera hartzeko aukera izango du.
16 urtetik gorakoek, aldiz, aurrez izena eman beharrik gabe parte hartu ahal izango dute. Haientzat sarrera egunean bertan egongo da zabalik, 00:30etik aurrera, hain zuzen ere.
Antolatzaileek parte-hartzaileei etxeko trapu zaharrez jantzita etortzea gomendatzen diete, giro beldurgarriagoa osatzeko. Hori horrela, arimez beteriko gauean, ausartenek izango dute komentua zeharkatzeko aukera.