Martin eta Xabier Etxeberria anaiak eleberri grafikoen munduan murgilduta jarraitzen dute, eta proiektu berri bat argitaratu berri dute: irakurle gazteei bideratutako Margot lana, Arianna Pisani artista italiarraren irudiekin. Liana argitaletxeak plazaratu du euskaraz eta gazteleniaz, aldi berean.
Kontakizunak historia eta fantasia uztartzen ditu; hau da, ipuin tradizionalen giro fantastikoa du, baina testuinguru historiko batean kokatua, Landak basamortu izatetik pinudi izatera igaro ziren garaian. Buruz behera hazten den zuhaitz baten istorioa da, eta bi munduren arteko talka agertuko da: landa eremua eta modernitatea.
Istorioan Margot izeneko neska gazte batek zuhaitz baten hazia landatuko du bere amaren hiletaren ondoren. Familiako tradizioa da: bizitzak aurrera jarraitzen duela esan nahi du horrela. Margotentzat, ordea, ezerk ez du berdin jarraitzen, bat-batean bere bizitza osoa aldatu egin zaio. Antzeko sentimendu bat hedatuko da Landetan ere, pinuen landatze masiboari buruzko lege berriaren ondorioz.