Izena eman daiteke dagoeneko 46. Bikote Mistoen Krosean. Aurten, azaroaren azken igandean izango da lasterketa, hilaren 30ean, hain zuzen ere.
Bikoteak hasi dira jada hitzordu klasikoa prestatzeko entrenamendu saioekin, Malekoian zein Alde Zaharrean barrena. Probaren egunean, 11:00etan aterako dira parte hartzaileak Aritzbatalde kiroldegiaren aurretik, eta 7,8 kilometroko ibilbidea osatu beharko dute helmugara iristeko.
Hori hala, 16 urtetik gorako edonork eman ahal izango du izena krosean, herrikrosa.eus webgunean. Dortsalak jasotzeko aukera, berriz, probaren aurreko egunean nahiz probaren egunean bertan: larunbatean 16:30etik 18:30era eta igandean 09:00etatik 10:30era egongo da dortsalen postua zabalik, Aritzbataldeko pilotalekuan.