Isabela Avila judoka txapeldunorde izan da Espainiako Kopan

Ian Ruiz Lizaso 2025eko urriaren 8a

Larunbatean Santanderren (Kantabria, Espinia) jokatu zuten txapelketa, eta Avila Kadete Mailan nagusitu zen. Espainia mailako judoka onenek parte hartu zuten bertan. Halaber, igandean Gipuzkoako Senior Txapelketa jokatu zuten Urnietan (Gipuzkoa).

Judoko Espainiako Txapelketa jokatu zen pasa den larunbatean Santaderren (Kantabria, Espainia), kadete mailako judoka onenek. Judo Klub Lizardi taldeko zortzi judoka aritu ziren bertan lehian. Emaitzen artean, Isabela Avilarena da aipagarrienetako bat, 70 kiloko kategorian txapeldunorde geratu baitzen, finalean Valentziako ordezkariaren aurka galdu ondoren.

Klubeko beste ordezkariei dagokionez, honako emaitzak lortu zituzten: Eva Manzanas bigarren txandan kaleratu zuten, 57 kiloko kategorian, eta Martxel Eizagirre (81kg), Iñigo Osa (73kg), Irati Aramendi (57kg) eta Iñaki Goenaga (+100kg), lehen fasean kanporatu zituzten.

Klubak adierazi duenez, jokatu zuten gazteek jarrera eta ahalegin "bikaina" erakutsi zuten. Gainera, balorazio "oso positiboa" egin dute, txapelketa honek klubaren formakuntza ibilbidea eta judoken mailaren hazkundea bultzatu dituelako.

Gipuzkoako Txapelketa

Bestalde, igandean, Gipuzkoako Senior Txapelketa jokatu zuten, Urnietako (Gipuzkoa) kiroldegian. Gipuzkoako Judo Federazioak antolatutako lehiaketak lurraldeko kategoria absolutuko judoka onenak bildu zituen. Judo Klub Lizardi taldeak hamaika kirolari aurkeztu zituen, bost emakumezko eta sei gizonezko.

Emakumezkoen artean, denek eskuratu zuten domina. Esaterako, 52 kiloko kategorian, Eva Manzanas izan zen txapelduna, eta 57 kiloko kategorian Ane Condek zilarra lortu zuen. Kategoria berean urrea eskuratu zuen Nahia Arregik. 70 kiloko kategorian, berriz, Diana Lopez nagusitu zen, eta Naiara Villasantek itxi zuen domina sorta, 78 kiloko kategorian irabazita.

Gizonezkoen kategorian, berriz, lehia estuagoa izan zen. 60 kiloko kategorian, Unax Mendezek brontzezko domina eskuratu zuen, eta +100 kiloko kategorian, Lander Rezabal hirugarren postuan sailkatu zen. Honez gain, Beñat Villanueva, Rodrigo Novoa, Xabier Aginaga eta Javier Benitez ez ziren finalerdietara iritsi, baina maila ona erakutsi zuten.

Emaitza horiei esker, jardunaldi borobila izan dela baieztatu du Lizardi Judo Klubak. Gainera, Euskadiko Txapelketarako txartela lortu dute, bi astebururen buruan Urnietan (Gipuzkoa) bertan jokatuko dena.

Kirola Zarautz

Zarautz Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.

Izan Gukakide