Palestinarekin Elkartasuna plataformak deituta, makina bat zarauztar elkarretaratu da gaur arratsaldean Lege Zaharren Enparantzan Gazaren aurkako genozidioa salatzeko eta Israeli boikota egitea eskatzeko. Mobilizazioaren arrazoi nagusia izan da Gazara heltzear den Global Sumud ontzidiaren erdia -hogeibat ontzi inguru- atzeman dituela bart Israelek; laguntza humanitorioa eramatera zihoazen 200 bat ekintzaile atxilotu dituzte, alegia.
"Erasoa" salatzeko, aipatu plataformak mobilizazioak deitu ditu herriz herri. Zarauztarrek irmo erantzun dute, azken deialdietan bezala, eta Gazako setioa hautsi! Israel desegin mezua zeraman pankartarekin irten dira plazara, Palestinari elkartasuna adieraztera eta Israel gaitzestera, oihu eta aldarri, dozenaka bandera airean zirela.
Elkarretaratzearen amaieran, herritar batek hartu du hitza, eta gaurko elkarretaratzearen arrazoiak azaltzeaz gain, Gazak eta Palestinak une honetan bizi duen egoeraren berri eman du. Era berean, Palestinarekin Elkartasuna plataformak larunbaterako Iruñean deitu duen manifestazio nazionalean parte hartzeko deia egin du; Palestinar erresistentzia aurrera; Israel desegin lelopean antolatu dute, eta elkarretaratzean pankartarik ere ikusi ahal izan da.