Asteburu honetan ziren jokatzekoak Ibon Imazen Oroimenezko surf txapelketa herrikoia, baina eguraldiaren iragarpenak onak ez direla ikusita, Zarauzko Surf Elkarteak egitasmoa atzeratzea erabaki zuen atzo. Orain, ordea, atzera egin du klubak, eta hasierako datarekin aurrera jarraitzea erabaki du. Beraz, larunbat eta igande honetan izango da lehia, nahiz eta eguraldi iragarpena ona ez izan.
29. edizioa izango da aurtengoa, eta izena emateko epea zabalik jarraitzen du. Maila bakarrean parte hartu ahal izango da, eta izen-emateak 15 euro balio du. Informazio gehiago eskuratzeko nahiz izena emateko, Zarauzko Surf Elkartearekin jarri behar da harremanetan, zse@zarauzkosurfelkartea.com posta elektronikora idatzita.