2023an gertatu bezala, aurten ere ez du irabazlerik izango 44. Lizardi Saria literatur lehiaketak. Epaimahaiaren iritziz, "aurkeztutako lanek ez dute sariketa honek urteetan izandako mailari eusteko kalitaterik" erakutsi, eta horregatik erabaki dute edizio honek ere irabazlerik ez izatea.
Castillo Suarezek, Kati Olaizolak eta Alex Gurrutxagak osatu dute aurtengo epaimahaia, eta irailaren 16an elkartu ziren aurkeztutako sei lanak aztertzeko. Aurtengo edizioa gazte literaturari lotutakoa zen, 13 eta 17 urte bitarteko irakurleei zuzendutakoa.
Hori horrela izanik, Lizardi Saria literatur lehiaketaren 45. edizioa antolatu eta prestatzeari ekingo dio orain Zarauzko Udalak, "haur eta gaztetxoentzako literatura suspertzeko helburuarekin".