Sugar padel taldeko gizonek Euskadiko Padel Txapelketa jokatu dute asteburuan, eta haiek azaroaren 14tik 16ra bitartean Bartzelonan izango den V. Espainiako Kopara sailkatzea lortu dute. Euskadiko Txapelketako finala bi egunetan jokatu dute: zapatuan, Astigarragan (Gipuzkoa) jokatu zuten joaneko partida, eta atzo, Derion (Bizkaia), itzulerakoa. Bi egunetan garaile suertatu ziren Sugar taldekoak Padel Zamudio M3 taldearen aurrean. Taldekideetako bat Asier Goikoetxea zarauztarra da.
Bi egunetan hiruna partida jokatu behar izan zituzten Sugar taldeko hiru bikotek. Astigarragan, larunbatean, 5 eta 3 irabazi zuten joanekoa Jokin Segurola-Jon Zabala, Aiert Balerdi-Ekain Muguruza eta Beñat Uranga-Asier Goikoetxea bikoteek. Igandean, Derion, Segurola-Zabala, Balerdi-Uranga eta Eneko Aizpitarte-Goikoetxea bikoteek jokatu zituzten itzulerako hiru lehiak, eta Sugar taldekoek 8-0 irabazi zuten puntuetan. Guztira, 13-3 emaitza eskuratuta lortu dute Espainiako Kopa jokatzeko sailkatzea.
Azkoitiko, Azpeitiko eta Zarauzko kideek osatzen dute Sugarren gizonen taldea. Asteburuan taldea zortzi lagunek ordezkatu badute ere, urte guztian zehar hamahiru ordezkari aritu dira lehian; izan ere, Asier Larrañagak, Enaitz Muguruzak, Eneko Etxanizek, Iñaki Unanuek eta Iban Aranbarrik ere ordezkatu dute taldea txapelketan. Ordea, Bartzelonara bidaia hamar bat lagunek egitea aurreikusi dute Sugarrekoek.
