Euskal Astearen barruan, 'AAtik ZZra' emanaldia eskaini zuten atzokoan herriko hainbat eragilek. Ikusmina eragin zuen, eta goraino bete zen Lege Zaharren Enparantza, tarte dibertigarri bat igarotzeko asmotan.
Adimen artifiziala gaitzat hartuta, musika, bertsoak eta antzerkia uztartu zituzten oholtza gainera igo ziren zarauztarrek. Zehazki, Zarautztrik kultur elkarteko ikasleek, Motxian Etxebeltz bertso eskolako kideak, Jalgi dantza taldeak, Goizeko Ihintza txistulariek, Arrai Zopa taldeak, Alproja antzerki taldeak eta Montetxio abesbatzak parte hartu zuten atzokoan.
Iaz, Euskal Jaien mendeurrena zela eta, Euskal Jaiak ehun urtez herria ehuntzen ikuskizuna eskaini zuten, eta eguraldi kaskarra egin zuenez, Lizardi aretora eraman zuten.