Dorota Kędzierzawska zinema zuzendariaren lana izango dute aztergai gaur Photomuseumen. Argazki eta zinema museoak sustatutako eta Zarauzko Udalak babestutako Gela kultur hedapenerako programaren barruan izango da, eta 18:00etan hasiko da, doako sarrerarekin.
90eko hamarkadan, Europa ekialdean, hainbat zinemagilek ikuspegi intimo eta poetikoak landu zituzten; horien artean nabarmentzekoa da Dorota Kędzierzawska poloniarraren lana. Esaterako, Diabły, biably (1991), Nothing (1998) eta Wrony (Beleak, 1994) proiektuengatik egin zen ezaguna. Kędzierzawskaren zinemaren ezaugarri nagusiak haurtzaroaren eta bakardadearen trataera dira, estilo xume, arin eta gizatiar baten bidez.