Euriak ez zituen atzera bota Izeta eskolakoak, eta hutsik egin gabe, aurrera jarraitu zuten asteazkenero egin ohi duten herri kirol erakustaldiarekin. Atzo arratsaldean izan zen uda denboraldiko azken-aurreko hitzordua, Lege Zaharren Enparantzan, eta eguraldia kaskarra izanagatik ere, herritar zein bisitari mordoa bildu zen plazan.
Txandaka aritu ziren Izeta eskolako zenbait kide plazaren erdialdean: esaterako, Ainitze Zumetak, Paulo Azpiazuk, Maddi Salterain Urra II.ak, Naroa Arrutik eta Jakes Iruretagoiena Izeta V.ak eskaini zuten ikuskizuna. Besteak beste, harri jasotzen, ingudearekin, aizkoran eta trontzan aritu ziren aipatutako kirolariak.
Hori horrela, datorren asteazkenean, hilaren 27an, agurtuko dute Izeta eskolakoek uda denboraldia. Ohikoa denez, 19:30ean izango da erakustaldia, Lege Zaharren Enparantzan.