Zarautz Arraun Elkarteko (ZAE) neska-mutilek hiru estropada jokatuko dituzte asteburu honetan. Aurreneko hitzordua gaur 16:00etan dute ETE ligako emakumezkoek, Camargon (Espainia). Toki berean lehiatuko dira KAE1 ligako gizonezkoak, 17:00etan. Bihar, etxetik gertuago, Donostian, lehiatuko dira emakumezkoak, arratsalde partean, 17:30ean. Donostiako Aste Nagusiko bandera izango dute jokoan azken horiek. Gizonezkoek, berriz, atsedena izango dute bihar.
Ligak azken txanpan sartzear dira; ETE eta KAE ligak Bilbon amaituko dira hilaren 23an, eta asteburu honetakoak kontatuta, bost estropada gelditzen dira ETE ligan, eta lau, KAE1en –tartean, etxeko ikurrinak izango dituzte jokoan hurrengo astean–. ZAEko bi ontziak sailkapenen goialdean daude: emakumeak lider, 92 punturekin, baina San Juan puntu bakarrera dutela. Badirudi bien artean egongo direla jokoan banderak eta liga bera, hirugarren sailkatua Kaiku baita, 79 punturekin.
Gizonak, berriz, hirugarren dira, 100 punturekin. Arkote da bigarren 107 punturekin, eta ontzi horrekin izango dute lehia zarauztarrek datozen estropadetan. Itsasoko Ama da lider, 115 punturekin.
Sailkapeneko puntuei erreparatuta, argi dago hemendik liga amaierara arteko estropada guztiak izango direla garrantzitsuak ZAEko neska-mutilentzat.
