Udalerri Euskaldunen Mankomunitateak (UEMA) prentsaurrekoa egin zuen atzo Zarautzen. Bertan salatu zuen Espainiako Auzitegi Gorenak EAEko Udal Legearen hainbat artikulu baliogabetu dituen epaia "euskal gizartearen eta euskal erakundeen erabaki demokratikoaren aurkakoa" dela, eta ohartarazi zuen euskararen ofizialtasuna zalantzan jartzen duela epai horrek.
Horregatik, elkarretaratzeak deitu zituen larunbat eguerdirako UEMAko kide diren herrietako udaletxeen aurrean. Protestak Euskararekin bat lelopean egingo dituzte, 12:00etan. Zarautzen, Lege Zaharren Enparantzan izango da elkarretaratzea, eta UEMAren deialdiaren harira, gaur adierazpen bateratua plazaratu dute Zarauzko EAJk eta EH Bilduk –udalbatzako 21 kideetatik 19 dira alderdi horietakoak–. Goitik behera bat egin dute atzo erakundeak Zarautzen egindako adierazpenekin, eta herritarrei eskatu diete parte har dezatela biharko hitzorduan.
Zarauzko Zirika euskara elkarteak ere jakinarazi du bat egiten duela UEMAren deialdiarekin.
