Emakume Sortzaileen III. Azoka egingo dute bihar, Zarauzko Udalak eta Emakumeen Etxeak elkarlanean antolatuta. Sormen esparruan aritzen diren emakumeei ikusgarritasuna ematea du helburu, haien lanari eta talentuari espazio bat eskainiz. Sortzaileen postuak malekoian eta Belauntzaran plazan –Emakumeen Etxearen aurreko parkean– jarriko dituzte aurreko aldietan bezalaxe.
Partaidetza zabala izango du aurtengo azokak ere, eta, guztira, 22 postu jarriko dituzte; sortzaile zarauztarrez gain, inguruko herrietako zenbaitek ere parte hartuko dute. Hainbat diziplinatako artisau produktuak ikusteko eta erosteko aukera egongo da: besteak beste, marrazkiak, bitxiak, paperarekin egindako lanak, margoak eta poltsak.
Egun osoan zehar egongo da zabalik azoka, eta ordutegi aldetik ez du etenik izango; 10:30etik 19:00etara bisitatu ahal izan da, hain zuzen ere. Goizean, irekierarekin batera, trikitilariek alaituko dute giroa, eta arratsaldean, berriz, haurrentzako sormen tailerrak egingo dituzte, 17:00etan hasita.