Zarautz Gesalaga Okelanek bikain hasi du ETE liga, bandera etxera ekarri baitute neskek gaur eguerdian Astillerotik (Espainia). Erlojuaren aurka aritu dira ontziak, eta 10:57:82 denbora markatu dute zarauztarrek, bi ziabogetan ere denbora onenak eginda, eta zazpi segundoko aldea atera diote bigarren izan den San Juango ontziari – 11:04:58 denbora egin du horrek–. Gainerako ontziak segundo askora helmugaratu dira; hirugarren egin duen Kaiku, esaterako, hogei segundora –11:17:83–.
Gizonezkoen ontziak ere fin hasi du liga, laugarren egin baitute emakumezkoen estropada eremu berean jokatu den KAE1 ligako aurreneko jardunaldian. Gainera, bigarren eta hirugarren postuak ere esku-eskura izan ditu, hiru ontzi helmugaratu baitira hiru segundoren barruan: Zumaia 20:22:82 denborarekin, Arkote 20:25:00 denborarekin, eta Zarautz, 20:25:97 denborarekin. Bandera Santurtzik lortu du, besteei alde handixeagoa aterata, 20:13:46 denborarekin.
Bihar, Pasaian
Gaurko emaitzek utzitako sentsazio onekin joango dira zarauztarrak biharko hitzorduetara, bigarren jardunaldiak jokatuko baitituzte Pasaian (Gipuzkoa) ETE nahiz KAE1 ligetan. Emakumezkoek Adinberri Bandera-XII. Pasaiako Ikurrina jokatuko dute, 11:45ean hasita. Linean jokatuko dute estropada, hiru kaletara, hiru luzerekin.
Ondoren, gizonen II. Adinberri Bandera-40. Pasaiako Ikurrina izango da jokoan. 12:35ean hasiko da lehia, eta estropada hori ere linean izango da, lau kaletara, sei luzerekin.
