Lau egunen ostean, San Isidro festak bere amaierara heltzen hasi dira, gaur baitute azken eguna. Hala eta guztiz ere, ondo pasatzeko gogoz jarraitzen dute oraindik auzotarrek, eta gaur ere jai giroa izan da nagusi Meagan.
12:00etan hasi dute gaur eguna, Gure Txeru dantza taldearen emanaldiarekin. Eguzkiak gogor jotzen zuen une horretan, eta ikusle gehienek gerizpea bilatu nahi izan dute gaztetxoen emanaldiaz gozatzeko. Jarraian, sagardoa eta txerriki errea dastatzeko aukera izan da, Izerren eta Alabierren musika saioak girotuta. Beranduxeago, patata tortilla txapelketa jokatu dute.
Festei ofizialki amaiera eman aurretik, sabela betetzen jarraitzeko bazkaria egin dute auzo elkartean. Arratsaldean, Izerrek eta Alabierrek girotuko dute auzoa, eta ondoren ikurrinaren jaitsiera egingo dute, festak agurtzeko.