Maiatzaren 18an Behorlegi mendia igotzeko irteera antolatu du Pagoeta Mendizale Elkarteak. Donibane Garazitik (Nafarroa Beherea) ikus daiteke Behorlegi, eta hiritik 13 kilometrora dago.
Guztira, 17 kilometroko ibilbidea egin beharko dute mendizaleek, 1000 metroko desnibel metatuarekin. Antolatzaileek aurreikusi dutenez, 6-7 orduko ibilaldia izango da.
Hori horrela, irteeran parte hartu nahi dutenek maiatzaren 16a bitarte izango dute inskripzioa egiteko aukera, Mendizabal kinkila dendan. Halaber, irteerarako ordua ere zehaztu dute: hain zuzen, Agoueseneko biribilgunean jarri dute elkartzeko puntua, 07:30ean.